Mae'r cyfweliadau a gynhaliwyd gydag amrywiaeth o ferched wedi tynnu sylw at y ffaith mai'r effaith fwyaf ar eu bywydau, yn bendant, oedd y system addysg. A hwythau wedi eu geni yn y cyfnod hwnnw yn union wedi'r rhyfel pan oedd y system addysg yn cael ei diwygio, roedd y cyfweledigion un ai yn cwympo i mewn i system dair haen o ysgol uwchradd fodern, ysgol ramadeg, ysgol dechnegol, neu'r categori ysgol gyfun. Dechreuodd y system ysgol gyfun yn 1965, sy'n golygu bod y rhai gafodd eu geni yn 1954 neu wedi hynny wedi mynychu ysgol gyfun, tra bod y rhai oedd wedi eu geni cyn 1953, wedi mynychu un ai ysgol uwchradd fodern, ysgol ramadeg neu ysgol dechnegol.