Dau fachgen yn hel Calennig, ddechrau'r ugeinfed ganrif. Mae rhoi rhoddion ar Ddydd Calan yn arfer hen iawn. 'Hel Calennig' oedd enw'r traddodiad hwn yng Nghymru. Byddai criwiau o blant yn mynd o dŷ i dŷ gan ddymuno pob iechyd a llwyddiant i'r teulu am y flwyddyn i ddod. Symbol o hyn oedd yr afalau a garient ar sgiweri, wedi'u haddurno ag ŷd a dail bytholwyrdd. Byddent yn canu penillion ar garreg y drws, ac yn cael rhodd o fwyd neu arian am eu trafferth. Mae'r arfer o gario afalau wedi hen ddiflannu erbyn hyn, a bellach dim ond adrodd penillion a chasglu ceiniog neu ddwy mae plant mewn ardaloedd lle mae'r traddodiad yn parhau.