Caleidosgop o liwiau yw'r disgrifiad a geir o draeth Aberystwyth yn y 'Borough Guide Book', a gyhoeddwyd gan Gyngor Tref Aberystwyth a Chwmni Edward J Burrows. Mae'r heidiau o ymwelwyr yn mwynhau Promenâd tua milltir a hanner o hyd (gan gynnwys yr estyniad newydd). Ar hyd Y Ro Fawr estynnir y cilgant o dai â golygfa dros y traeth. Mae gwelyau blodau'n harddu'r Promenâd ac mae digon o seddi i'w cael. Pan fo pen llanw, weithiau gellir gweld effeithiau'r môr yn arw, yn taro yn erbyn wal y môr. Ceir cerddoriaeth o safon yn ddyddiol yn y safle band. Ar y traeth mae'r plant wrth eu bodd yn chwarae, yn trochi yn y môr ac adeiladu cestyll tywod. Mae'r tywyslyfr hefyd yn nodi fod yno gerbydau ymdrochi ar gyfer pobl hŷn a chychod ar gyfer teithiau pleser yn y bae am bris rhesymol. Mae ymwelwyr yn aml yn casglu cerrig mân a cherrig prin sydd i'w cael ar y traeth ac yn mynd â nhw adref gyda nhw.