'Salem' yw darn o waith enwocaf Sydney Curnow Vosper, sef portread o Siân Owen, Ty'n-y-fawnog. Prynwyd y darlun gorffenedig gan William Heskith Lever ar gyfer Oriel Gelf yr Arglwyddes Lever, ac fe'i atgynhyrchwyd ar ôl hynny mewn hysbysebion ar gyfer Sunlight Soap. Mae poblogrwydd mawr y darlun, yn enwedig yng nghymunedau diwydiannol de Cymru, wedi ei briodoli i'r teimladau hiraethus yr oedd yn dwyn i gof am ffordd o fyw a oedd yn prysur ddiflannu yn y Gymru wledig.

Nodwedd ddiddorol arall ynglŷn â'r darlun gorffenedig yw siôl yr hen wraig, oherwydd dywedir fod pen y diafol yn cuddio o fewn ei phatrwm bersli. Mae rhai pobl wedi dadlau bod y gwawdlun hwn o'r diafol yn ymgais i bortreadu balchder a rhagrith rhai Anghydffurfwyr. Fodd bynnag, roedd yr arlunydd ei hun yn gwadu bod hyn yn fwriad ganddo.