Daethpwyd o hyd i'r diodlestr hwn 'o dan garreg fawr' gerllaw safle claddu ar dir Neuadd Aberbechan, Llanllwchaearn, ger Y Drenewydd.

Roedd crochenwaith rhychiog y cyfnod Neolithig yn parhau i gael ei gynhyrchu yn ystod blynyddoedd cynnar yr Oes Efydd, ond rhwng 2200 a 1600 CC, cyrhaeddodd crochenwaith Pobl y Biceri wledydd Prydain a gorllewin Ewrop yn gyffredinol. Nid yw tarddiad y math hwn o grochenwaith yn hysbys, ac ni wyddys ychwaith sut y llwyddodd i ledaenu mor gyflym. Fel y gwelir yn yr enghraifft nodweddiadol hon, mae ffurf ac addurniadau geometrig arbennig yn perthyn i'r math hwn o grochenwaith. Cafodd crochenwaith Pobl y Biceri ei ddisodli yn y pen draw gan lestri bwyd ac yrnau.

Disgrifiad: Amgueddfa Powysland a Chanolfan Camlas Trefaldwyn