Yn y llythyr hwn at Mrs Anne Jones, mae Lewis Humphreys yn dweud ei fod yn dda ganddo glywed am lwyddiant ei gŵr, y Parch. Michael D. Jones, a Dr Pan Jones yn yr Unol Daleithiau. Teithiodd y ddau i'r Unol Daleithiau ym 1870 i godi arian i Goleg Annibynnol y Bala ac i hyrwyddo'r Wladfa Batagonaidd.

Derbyniodd Humphreys lythyr gan hen lanc o Sir Benfro a ymfudodd i Awstralia ond sydd bellach yn awyddus i ymfudo i Batagonia. Yn ddiweddar, darllenodd Humphreys lythyr a anfonodd Mr Matthews o'r Wladfa - roedd yn canmol 'y wlad a'r cnydau diweddaf' ond yn cwyno ynghylch 'diffyg manteision addysg i'r plant'. Wedi dweud ei fod am wneud ei orau i berswadio Cymry Awstralia i ymfudo i Batagonia, mae Humphreys yn gorffen ei lythyr drwy hysbysu ei fwriad i ddychwelyd i Batagonia cyn gynted â phosibl.