Daw'r tudalennau canlynol o Gofrestr Mynediad Ysgol Genedlaethol Llanllechid, ac maent yn ymdrin â'r cyfnod rhwng 1901-03, sef blynyddoedd Streic Fawr Chwarel y Penrhyn. Gwelir bod nifer o blant wedi gorfod gadael yr ysgol yn ystod y cyfnod hwn wrth i'w teuluoedd godi eu pac a mynd i chwilio am waith yn ne Cymru. Mae'r Gofrestr hefyd yn dangos sut yr oedd y plant yn cael eu heffeithio gan y tensiynau a'r rhaniadau dwfn a oedd wedi dod i'r amlwg yn y gymdeithas chwarelyddol hon yn ystod y streic. Penderfynodd nifer o rieni symud eu plant o'r ysgol gan nad oeddynt yn fodlon iddynt gymysgu â phlant 'cynffonwrs' neu 'fradwyr'.