Anfonwyd y llythyr hwn gan Evan Evans, Turin, Lewis Co., Efrog Newydd at ei ewythr yn Ninas Mawddwy, Sir Feirionnydd, ym mis Awst 1856. Roedd Evan newydd ymfudo i Unol Daleithiau America o ardal Dinas Mawddwy. Ysgrifenna am y fordaith a dywed iddo fod yn sâl iawn ar y môr. Roedd y tywydd yn boeth iawn pan gyrhaeddodd ac mae'r tir yn anial iawn 'a digon anifir i'm golwg i'. Mae Evan yn gweithio gyda dau o Gymry eraill, sef gŵr o Sir Ddinbych a gwraig o Lanbryn-mair - ei gyflog misol yw £2. 14 swllt. Mae'n byw tua deuddeng milltir o gartref ei frawd ond nid oes capel Cymraeg yn agos ato. Mae'n amlwg bod Evan yn hiraethu'n fawr am ei deulu a'i gartref ac ar ddiwedd y llythyr mae'n cynghori John, Hendre, i aros adref, 'os daw yma bydd yn edifar ganddo ganwaeth: os bydd yn debig i mi'.