Cloddiwyd y ddysgl hon i'r wyneb ar safle Crochendy Brookhill, Bwcle, lle cafodd ei gwneud tua 1640-1670.

Sgraffito yw'r enw ar dechneg arbennig a ddefnyddir i addurno crochenwaith. Bydd haenen o glai hylif (slip) yn cael ei arllwys dros y potyn i gyd ac wedi iddo galedu bydd cynllun yn cael ei grafu drwy'r slip i ddatgelu lliw cyferbyniol y potyn oddi tano.

Credir bod y cynllun ar y ddysgl hon yn tarddu o'r hen lawysgrifau a lluniau bwystawr a ddaeth yn boblogaidd unwaith yn rhagor yn ystod y 1500au a'r 1600au. Roedd y casgliadau hyn o chwedlau moesol yn defnyddio straeon am anifeiliaid, planhigion, adar a physgod i gyfleu dealltwriaeth o'r ysgrythyrau. Roedd y da a'r drwg wedi eu hymgorffori ym myd natur ac wedi eu rhannu ymhlith y rheini a oedd yn cynnwys nodweddion da a nodweddion drwg.

Mae'r ardal o amgylch Bwcle wedi cael ei chysylltu â'r diwydiant crochenwaith ers y 13eg neu'r 14eg ganrif. Yn ystod y chwe chan mlynedd rhwng y cyfnod hwnnw a chanol yr ugeinfed ganrif, gwyddom bod 19 o safleoedd gwahanol wedi cynhyrchu amrywiaeth eang o grochenwaith yn yr ardal. Yn ystod yr 17eg a'r 18fed ganrif, roedd nifer o'r nwyddau hyn o safon uchel iawn ac roeddynt yn cael eu hystyried o'r un safon â'r nwyddau a gynhyrchid yn Swydd Stafford yn ystod yr un cyfnod.