Cloddiwyd y 'tyg' (diodlestr) clai du hwn ar safle Crochendy Brookhill, Bwcle, lle cafodd ei wneud tua 1640-1670.

'Tyg' yw'r enw a roddir ar ddiodlestr o'r math hwn sy'n cynnwys dolenni addurnedig cain. Er mwyn creu'r lliw tywyll, cafodd y clai pridd coch ei orchuddio gan wydredd plwm a oedd yn cynnwys haearn.

Mae'r ardal o amgylch Bwcle wedi cael ei chysylltu â'r diwydiant crochenwaith ers y 13eg neu'r 14eg ganrif. Yn ystod y chwe chan mlynedd rhwng y cyfnod hwnnw a chanol yr ugeinfed ganrif, gwyddom bod 19 o safleoedd gwahanol wedi cynhyrchu amrywiaeth eang o grochenwaith yn yr ardal. Yn ystod yr 17eg a'r 18fed ganrif, roedd nifer o'r nwyddau hyn o safon uchel iawn ac roeddynt yn cael eu hystyried o'r un safon â'r nwyddau a gynhyrchid yn Swydd Stafford yn ystod yr un cyfnod.