Dysgl bridd gwasg-fowldiedig gyda llinellau slip llusg ar waelod slip melyn. Cloddiwyd y ddysgl hon i'r wyneb ar safle Crochendy Brookhill, Bwcle, lle cafodd ei gwneud tua 1690-1720.

Cafodd y ddysgl hon ei gwneud drwy wasgu'r clai mewn mowld amgrwm. Rhoddwyd slip hylif melyn ar y clai yn gyntaf, cyn ychwanegu slip brown. Cyn i'r clai sychu, cafodd y ddysgl ei hysgwyd i greu'r effaith marmor. Mae'r ymyl wedi cael ei orffen gyda phatrwm sgolop pendant.

Mae'r ardal o amgylch Bwcle wedi cael ei chysylltu â'r diwydiant crochenwaith ers y 13eg neu'r 14eg ganrif. Yn ystod y chwe chan mlynedd rhwng y cyfnod hwnnw a chanol yr ugeinfed ganrif, gwyddom bod 19 o safleoedd gwahanol wedi cynhyrchu amrywiaeth eang o grochenwaith yn yr ardal. Yn ystod yr 17eg a'r 18fed ganrif, roedd nifer o'r nwyddau hyn o safon uchel iawn ac roeddynt yn cael eu hystyried o'r un safon â'r nwyddau a gynhyrchid yn Swydd Stafford yn ystod yr un cyfnod.