Adeiladwyd The Ivy Tower, a elwid yn wreiddiol 'The Belvedere', gan deulu cyfoethog Mackworth yn ystod y 1700au i ddifyrru gwesteion wrth iddynt gerdded o amgylch y stad.

Teulu Mackworth oedd yn berchen ar stad y Gnoll drwy gydol y 18fed ganrif, a nhw oedd yn gyfrifol am lawer iawn o'r datblygu diwydiannol yn yr ardal, yn ogystal â chreu'r gerddi trawiadol ar eu stad. Yn yr hyn a elwir yn Parc Gnoll erbyn hyn, mae Rhaeadrau Ffurfiol Ffrengig mawreddog a adeiladwyd yn y 1720au ac a ailddarganfuwyd ac a adferwyd yn y 1980au. Mae yno hefyd Raeadrau Mosshouse Woods, groto, a thri llyn mawr, y cyfan wedi'u hadeiladu gan deulu Mackworth. Yr awdurdod lleol sydd yn berchen ar Parc Gnoll erbyn hyn, ac mae ar agor i'r cyhoedd.