Awdur y llythyr hwn yw Charles de Gaulle, ewythr yr enwog Charles de Gaulle, Arlywydd Ffrainc. Anfonwyd y llythyr at y Parchedig John Peter (Ioan Pedr), a oedd yn cydweithio gyda'r Parch Michael D. Jones yng Ngholeg Annibynnol y Bala. Roedd de Gaulle yn ysgolhaig Celtaidd o fri ac yn y llythyr hwn, mae'n sôn am y gwahanol erthyglau a'r llyfrau y mae wedi eu cyhoeddi. Dywed wrth Ioan Pedr ei fod wedi anfon copi o un o'i lyfrau ato a bydd yn anfon mwy o ysgrifau ato cyn bo hir. Nid yw'n credu fod ei waith o unrhyw werth gwirioneddol, ond mae'n eu hanfon at Ioan Pedr fel arwydd o barch a diolchgarwch.