Agorwyd y Llawr Sglefrio Americanaidd, adeilad haearn rhychog anferth yn Heol y Porth, Caerdydd, gyferbyn â Swyddfa'r Post, ym 1908. Dros y blynyddoedd daeth miloedd o drigolion Caerdydd i'r llawr sglefrio i ddysgu sut i ddawnsio ar esgidiau rholio i gyfeiliant band pres. Roedd yr adeilad hefyd yn lleoliad i nifer o ddigwyddiadau chwaraeon a gwleidyddol: yma yr ymladdodd y bocsiwr o Gaerdydd 'Peerless Jim Driscoll' (1880-1925) yn erbyn Freddy Welsh (1886-1927) o flaen tyrfa o 10,000, ac yma hefyd y cynhaliwyd nifer o gyfarfodydd gwleidyddol, gyda Herbert Henry Asquith a David Lloyd George yn areithio yn eu tro. Tynnwyd y llawr sglefrio yn ddarnau wedi'r Rhyfel Byd Cyntaf, a'i ailgodi yn Heol y Felin, Trelái, lle cafodd ei ddefnyddio i adeiladu paneli concrit ar gyfer tai yn Sgwâr Caerau.