Roedd Charles Bassett yn gymeriad blaenllaw ym mywyd masnachol a chyhoeddus Pontypridd yng nghanol y 19eg ganrif. Roedd yn un o sefydlwyr Cwmni Marchnad Pontypridd ym 1877. Daeth i Bontypridd tua'r flwyddyn 1840 gan sefydlu cwmni llewyrchus fel fferyllydd, y busnes cyntaf o'i fath yn y dref. Ym 1843 cafodd ei benodi yn bostfeistr a hynny ar adeg pan anfonwyd llai na 400 o lythyrau i'r dref bob wythnos. Yn rhinwedd ei swydd fel postfeistr daeth Bassett yn gyfrifol am fabwysiadu'r enw Pontypridd ar y dref ym 1856. Cyn hynny, 'Newbridge' oedd enw'r dref hon ar lan Afon Taf ond roedd Bassett yn awyddus i ddatrys y dryswch a oedd yn codi wrth i'r dref gael ei chamgymryd am Newbridge (Trecelyn), Sir Fynwy, a Newbridge (Pontnewydd-ar-Gwy), Sir Faesyfed.

Ffynhonnell:
'The Old Photographs Series: Pontypridd', wedi eu dethol o Gasgliad Canolfan Treftadaeth a Hanes Pontypridd, gan Simon Eckley a staff y Ganolfan (Chalford Publishing, Stroud, 1994).