Cynhwysion

• tua llond mesur chwart o lymrïaid
• saim cig moch

Dull

• Golchi’r llymrïaid yn dda, torri’u pennau i ffwrdd, gwasgu’r perfedd allan a’u ffrio mewn saim cig moch.
• Gellir ffrio nionyn gyda hwy, os dymunir.

Byddid yn eu bwyta i ginio neu swper, fel rheol.

Nefyn, Llŷn.

Nid peth anghyffredin oedd gweld gwŷr, gwragedd a phlant yn hel llymrïaid ar y traethau ar noson olai leuad yn ystod misoedd yr haf gynt. Byddid yn ‘llymreita’ liw nos ar ôl y llanw, a defnyddid rhaw neu gryman i durio am y pysgod bach hyn a ymguddiai yn y tywod. Fel rheol, byddai un person yn turio amdanynt ac un arall yn eu codi i fwced neu biser. 

Pen-bryn, Aberteifi.