Penodwyd Griffith Jones yn rheithor Eglwys Llanddowror ym 1716, a bu’n byw yno am weddill ei oes. Ym 1731, dechreuodd drefnu ysgolion cylchynol yn Sir Gâr, wedi’i ysbrydoli gan ei ddysg ei hun a syniadau’r Gymdeithas er Hybu Gwybodaeth Gristnogol (yr SPCK) yr oedd yn aelod ohoni. Sefydlodd Jones yr ysgolion hyn fel y gallai’r bobl gyffredin ddysgu darllen y Beibl, a thrwy hynny ddysgu’r hanfodion ar gyfer eu hiachawdwriaeth.