Mae erthygl newydd ar wefan Y Bywgraffiadur Cymreig gan David Meredith am fywyd a gwaith Syr John Kyffin Williams (1918-2006), arlunydd enwocaf Cymru, a anwyd yn Llangefni, Ynys Môn. Bu Kyffin Williams yn athro celf yn Llundain am flynyddoedd cyn dod yn adnabyddus fel artist. Trobwynt allweddol yn ei yrfa oedd ei ymweliad â Phatagonia yn 1968, ac yn fuan wedyn penderfynodd ddychwelyd i Fôn lle y treuliodd weddill ei oes yn darlunio tirwedd a phobl ei gynefin. Roedd yn gymwynaswr hael i fyd celf yng Nghymru, a gadawodd gasgliad gwych o'i waith i'r Llyfrgell Genedlaethol.