Tynnwyd y ffotograff gan Geoff Charles. Yma gwelir Cadwaladr Roberts, Hendre Mawr; Robert Jones, Ty Nant; Arthur Morris Roberts, Craig yr Onwy; Glyn Davies, Y Fferm; George Roberts, Arenig; Gwilym Prysor Jones, Ty'n y Bont; a Morris Roberts, Craig yr Onwy, yn cneifio.

Ym 1955, cyhoeddodd Corfforaeth Lerpwl ei bwriad i adeiladu cronfa ddŵr newydd yng Nghwm Tryweryn, gan foddi pentref Capel Celyn, i'r gogledd o dref y Bala. Lansiwyd ymgyrch ddygn i wrthwynebu'r cynlluniau gan drigolion ac awdurdodau lleol, unigolion a sefydliadau cenedlaethol, ond er gwaethaf pob ymdrech ni lwyddwyd i rwystro'r datblygiad ac ar 1 Awst 1957 pasiwyd Deddf Corfforaeth Lerpwl. Dechreuodd y gwaith ar y safle dair mlynedd yn ddiweddarach ac fe gwblhawyd y cynllun ym mis Awst 1965.