Tynnwyd y ffotograff gan Geoff Charles. Yma gwelir wyth o'r pedwar plentyn ar ddeg a oedd yn byw ar fferm Tŷ Nant, Cwm Croes, Capel Celyn. Adeiladwyd y gronfa ddŵr yn Nhryweryn yn agos iawn at ffermdy Tŷ Nant. Roedd pump o'r naw o blant a oedd yn mynychu Ysgol Capel Celyn yn dod o fferm Tŷ Nant.

Ym 1955, cyhoeddodd Corfforaeth Lerpwl ei bwriad i adeiladu cronfa ddŵr newydd yng Nghwm Tryweryn, gan foddi pentref Capel Celyn, i'r gogledd o dref y Bala. Lansiwyd ymgyrch ddygn i wrthwynebu'r cynlluniau gan drigolion ac awdurdodau lleol, unigolion a sefydliadau cenedlaethol, ond er gwaethaf pob ymdrech ni lwyddwyd i rwystro'r datblygiad ac ar 1 Awst 1957 pasiwyd Deddf Corfforaeth Lerpwl. Dechreuodd y gwaith ar y safle dair mlynedd yn ddiweddarach ac fe gwblhawyd y cynllun ym mis Awst 1965.