William: Fe brynon ni’r fferm hon ar ddiwedd 1978 ac fe symudon ni i mewn ar ddechrau 1979, roedden ni mewn fferm ym Mhontardawe am chwe blynedd cyn hynny. Roeddwn i'n 4 a hanner pan symudon ni i'r fferm hon. Roedd fy rhieni’n dod o gefndiroedd ffermio gyda chenedlaethau ymhell cyn hynny i gyd yn ffermio. Mae gen i dri brawd ac mae pob un ohonom wedi tyfu i fyny ar y fferm, ond, fel mae ffermio, dim ond un incwm y gallwch chi ei gael wrth ffermio. Felly, fi yw'r unig un sydd wedi aros ar y fferm.
Mae gennym ni 115 erw yma, mae 60 arall, efallai 65 yn Aberhonddu, ac yn ddiweddar, rydyn ni wedi rhentu 50 erw arall ym Mhontarddulais, ychydig i lawr y ffordd oddi wrthym.
Rydyn ni'n ffermio cig eidion yn bennaf, ond mae gennym ychydig o ddefaid, rydyn ni'n tyfu ein hydau ein hunain. Roedden ni'n arfer tyfu tatws a llysiau. Rydyn ni wedi rhoi'r gorau i dyfu tatws ers dwy flynedd, ac mae'n debyg mai hwn yw ein tymor olaf o dyfu llysiau, yn bennaf am ei fod yn llafurddwys ac mae fy mhlant wedi tyfu i fyny ac nid ydyn ni wedi cael eu help ar y fferm i gael yr amser i wneud hynny. Felly, rydyn ni wedi penderfynu arallgyfeirio oherwydd hynny, a sefydlu gwersyllfa eleni, o'r enw Panoramic Camping and Glamping.
Cyfwelydd Sian Green: Pryd fydd y wersyllfa'n agor, felly?
William : Agorodd y wersyllfa yn ystod trydedd wythnos mis Gorffennaf eleni, mewn pryd ar gyfer gwyliau'r haf. Roedd hi'n araf iawn i ddechrau, ond roedd pethau wedi prysuro erbyn gwyliau'r haf ac mae wedi distewi yn awr. Rydyn ni'n derbyn archebion gwersylla yn bennaf ar gyfer gweddill y tymor.