Anfonwyd y llythyr hwn o wersyll Sutton on Hull yn Swydd Efrog lle'r oedd Owen yn gwasanaethu gyda 3ydd Bataliwn Ffiwsilwyr Swydd Gaerhirfryn. Mae wedi derbyn llythyr gan Evan [ei frawd] ynghyd â phapur doctor, ond nid oes gobaith y caiff ddychwelyd adref i helpu gyda'r gwair. Mae'n sôn y byddai'n well iddynt beidio ag anfon dillad eto gan fod siawns am benwythnos yn fuan. Mae'n nodi fod llawer o'r dynion wedi gadael am Hornsea [Swydd Efrog] ddydd Llun diwethaf. Yn ôl Owen, dywedodd y Sarsiant wrthynt na fyddent yn dychwelyd i'r gwersyll ond y byddent yn cael eu hanfon 'off to Salonika or somewhere'. Ar ddiwedd y llythyr, dywed ei fod yn credu mai efallai i'r India neu'r Aifft y bydd yn rhaid iddo fynd nesaf.