Mae Lewis Jones yn ysgrifennu at Michael D. Jones i'w hysbysu fod y Pwyllgor Gwladychfaol wedi penderfynu cyhoeddi papur newydd ['Y Ddraig Goch']; bydd yn ymddangos bob pythefnos ac ar werth am geiniog. Gofynna a fyddai Michael D. Jones yn fodlon gweithredu fel golygydd, er na fydd tâl am y gwaith. Dywed fod dirfawr angen cyhoeddiad o'r fath, gan nad yw'r mudiad yn cael chwarae teg yn y papurau newydd Cymraeg. Cyfeiria yn benodol at sylw a wnaed yn ddiweddar gan olygydd 'Baner ac Amserau Cymru' ac at lythyr a ysgrifennwyd gan 'Twrch'. Mae'n awyddus i weld Michael D. Jones yn dod i Lerpwl i roi anogaeth i'r hyrwyddwyr eraill.