Mae Mihangel ap Iwan yn cychwyn y llythyr hwn trwy nodi nad yw'n cofio'r tro diwethaf iddo ysgrifennu at ei fam gan ei fod mewn cymaint o ffwdan yn paratoi ar gyfer dyfodiad Floie. Mae'n gobeithio y gwna wraig dda iddo. Mae'n ferch gariadus a chryn allu ganddi, a chred eu bod yn addas i'w gilydd. Er gwaethaf y newid hwn yn ei amgylchiadau, dywed y gwna yr hyn a all i helpu ei fam os yw mewn helbul. Hoffai fynd adref i'r Bala i'w gweld ymhen pedair neu bum mlynedd. Gofynna a yw Ms Thomas yn cadw cwmni iddi yn Bodiwan. Derbyniodd lythyr oddi wrth ei frawd, Llwyd, oedd yn Llundain ar y pryd. Mae Mihangel yn brysur yn paratoi'r tŷ ac yn dweud ei fod wedi mynd yn lled gostus iddo. Mae wedi yswirio ei fywyd am £1,000 ac mae'n gwneud popeth yn ei allu i ddarparu ar gyfer gwraig a phlant.