Sefydlwyd Cymdeithas Genhadol Patagonia er mwyn codi arian ar gyfer gwaith cenhadol y Parchedig D. Lloyd Jones, a anfonwyd i weithio fel cenhadwr ymhlith pobl frodorol Patagonia. Roedd cyfeillion y genhadaeth wedi gofyn i Gymdeithas Genhadol Llundain anfon cenhadwr i Batagonia, ond aflwyddiannus fu eu cais. Ni chafwyd unrhyw gymorth ariannol i gefnogi gwaith y Parchedig D. Lloyd Jones ychwaith. Yn yr adroddiad hwn, dywedir bod y Parchedig D. Lloyd Jones yn byw ar y nesaf peth i ddim ac yn ei chael yn anodd iawn i gynnal ei wraig a chwech o blant. Er mwyn iddo barhau â'i waith, gofynnwyd i'r eglwysi yng Nghymru anfon rhan o'u casgliadau i Gymdeithas Genhadol Patagonia. Trysorydd y Gymdeithas oedd Thomas Gee, Dinbych. Mae’r adroddiad yn cynnwys manylion ynghylch yr holl dderbyniadau a ddaeth i law yn ystod y cyfnod 1875-6.