Mae'r cerdyn post hwn yn perthyn i gasgliad o gardiau post a gyhoeddwyd gan y 'Western Mail', c. 1903-5. Enw'r gyfres oedd y 'Colliery Series'. Mae chwech o'r saith cerdyn post yn dangos lluniau coch a du dramatig o'r glowyr wrth eu gwaith o dan y ddaear, ac maent wedi eu harwyddo gan J. M. Staniforth. Fodd bynnag, mae un o'r cardiau post o liw glas ac yn dangos golygfa pur wahanol o lofa, sef 'A South Wales Colliery' - nid yw'r cerdyn hwn wedi ei arwyddo gan Staniforth. Ganed Staniforth yng Nghaerdydd ym 1863 a dechreuodd gyhoeddi ei gartwnau yn y 'Western Mail' ym 1889. Daeth ei gartwnau yn nodwedd bwysig yn y papur dros y blynyddoedd dilynol ac maent yn cynnig sylwebaeth dreiddgar ar sawl agwedd ar fywyd Cymru yn ystod y cyfnod.