Un o gyfres o luniau'n cofnodi 'Cerdded Terfynau Bwrdeistref Y Trallwng', digwyddiad anarferol a oedd yn digwydd dros gyfnod o bedwar diwrnod ym mis Medi, 1906. Mae'r unig ddogfen sydd i law sy'n sôn am y digwyddiad, yn nodi cyfarwyddiadau manwl ynglŷn â llwybr y daith, gan gynnwys cyfeiriadau at wrychoedd a choed neilltuol, ac yn seiliedig ar derfyn a ddiffiniwyd ym 1818. Er yn debyg iawn i draddodiad cerdded terfynau plwyf, digwyddiad dinesig yn hytrach nag eglwysig oedd hwn, ac un mae'n amlwg oedd yn denu cefnogaeth dda.