Mae hwiangerdd yr ystlumod wedi’i gyfansoddi o ddarlleniadau sonar a gymerwyd yn y maes gyda Stars of the Night Bat Conservation mewn clwydfan ystlumod pedol lleiaf yn y Gŵyr. Mae’r geiriau’n seiliedig ar sgyrsiau gyda gwirfoddolwyr cadwraeth ystlumod. Dechreuodd aelodau Côr Hemiola ddysgu’r hwiangerdd, dan arweiniad Delyth Holland. Yna, recordiwyd yr hwiangerdd yn stiwdio Cheryl, ac yn olaf, ffilmiwyd aelodau’r côr ar leoliad gan y peilot drôn Jarro Media yng Nghoedwig Dyffryn Penllergaer.

Galarnad yw gwarchodwyr y ffen am anwareiddiad gwladychiaeth flodau, sy’n dal i gael ei ymarfer heddiw. Gan symud o helwyr tegeirianau i warcheidwaid, mae’r gerddoriaeth wedi’i chyfansoddi trwy fapio patrymau gwythiennau tegeirian ffen sy’n tyfu yn y gwyllt. Dysgodd aelodau Côr Hemiola y darn, fe’u recordiwyd yn stiwdio Cheryl, ac fe’u ffilmiwyd ym Mhenllergaer.

Mae portreadau gwiberod yn ddarn ysgrifennu creadigol, ffotograffiaeth a chelf sain gyda MIND Abertawe, sy’n dadadeiladu stereoteipiau negyddol trwy haiku a chyfansoddiad celf sain a gymerwyd o batrymau gwiber yn yr Ymddiriedolaeth Cadwraeth Amffibiaid ac Ymlusgiaid. Comisiynwyd Cariad Glass i wneud lens camera o hengroen a fwriwyd gan wiber, gan rymuso’r grŵp i dynnu hunanbortreadau trwy groen y neidr i gyd-fynd â’r gair llafar.

Am yr artist:

Mae Cheryl Beer yn artist sain amgylcheddol sydd wedi ennill clod rhyngwladol, sy’n cyfansoddi o arwyddion gweledol o fewn natur i godi ymwybyddiaeth o amgylcheddau bregus a’n bregusrwydd ni fel rhan ohonynt. Ers colli ei chlyw yn sydyn, tinitws cronig a hyperacwsis, mae hi wedi datblygu arferion creadigol arloesol, gan archwilio ymdeimlad greddfol o le, lle mae llais natur yn cael lle canolog. 

Bu ei symffoni Cân y Coed, sydd wedi’i lleoli yng nghoedwigoedd glaw Cymru, yn cynrychioli’r DU yng Ngardd Fawr Qatar, lle’r oedd hi hefyd yn rhan o Sgwad Diwylliannol Cymru ar gyfer Cwpan y Byd. Anrhegwyd ei gwaith i urddasolion rhyngwladol yng Ngemau’r Gymanwlad a’i arddangos yn Nau Dŷ’r Senedd. Yn 2025, arddangoswyd ‘Climate Crescendo’, ei chomisiwn yn seiliedig ar ddarlleniadau tymheredd o goedwigoedd glaw’r Amazon, am fis yng Ngŵyl Cultura Inglesa, Brasil. Yn ddiweddar, cwblhaodd Gymrodoriaeth 18 mis Dyfodol Cymru gyda Chyngor Celfyddydau Cymru, wedi’i lleoli fel artist preswyl yng Ngardd Fotaneg Genedlaethol Cymru, gan archwilio ffyrdd y gall y celfyddydau ddyfnhau cysylltiadau emosiynol â’r byd naturiol. Ers hynny, mae hi wedi ymgorffori canfyddiadau ei hymchwil yn Natur am Byth! gan gysylltu cymunedau Bae Abertawe â rhywogaethau prin, a’r rhai sydd mewn perygl.

Mae Cheryl wedi’i hanrhydeddu fel un o’r 100 o fenywod ysbrydoledig gorau Cymru gan Rwydwaith Cydraddoldeb Menywod Cymru a Llywodraeth Cymru am ei chyfraniad i’r celfyddydau ac iechyd, a hi oedd yr artist cyntaf yng Nghymru i gael Gwobr Aur Genedlaethol am ei hymchwil i gelfyddydau amgylcheddol, hanes bywyd a dementia.